กุสโล โลกุตฺตโร ธมฺโม กุสลสฺส โลกุตฺตรสฺส ธมฺมสฺส อธิปติปจฺจเยน ปจฺจโยฯ (1)

อพฺยากโต โลกุตฺตโร ธมฺโม อพฺยากตสฺส โลกุตฺตรสฺส ธมฺมสฺส อธิปติปจฺจเยน ปจฺจโยฯ อพฺยากโต โลกุตฺตโร ธมฺโม กุสลสฺส โลกุตฺตรสฺส ธมฺมสฺส อธิปติปจฺจเยน ปจฺจโยฯ (2)

กุสโล โลกุตฺตโร ธมฺโม อพฺยากตสฺส โลกุตฺตรสฺส ธมฺมสฺส อนนฺตรปจฺจเยน ปจฺจโยฯ (1)

อพฺยากโต โลกุตฺตโร ธมฺโม อพฺยากตสฺส โลกุตฺตรสฺส ธมฺมสฺส อนนฺตรปจฺจเยน ปจฺจโยฯ (1) (สํขิตฺตํฯ)

[40] เหตุยา ทฺเว, อารมฺมเณ ทฺเว, อธิปติยา ตีณิ, อนนฺตเร ทฺเว, สมนนฺตเร ทฺเว, สหชาเต ทฺเว, อญฺญมญฺเญ ทฺเว, นิสฺสเย ทฺเว, อุปนิสฺสเย จตฺตาริ…เป.… อวิคเต ทฺเว (สํขิตฺตํ)ฯ

(ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

1-13. กุสลตฺติก-เกนจิวิญฺเญยฺยทุกํ

1-7. ปฏิจฺจวาราทิ

ปจฺจยจตุกฺกํ

[41] กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ กุสลํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย จ อพฺยากโต เกนจิ วิญฺเญยฺโย จ ธมฺมา อุปฺปชฺชนฺติ เหตุปจฺจยาฯ (3)

อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ เหตุปจฺจยา… ตีณิฯ

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ (1)

กุสลํ เกนจิ วิญฺเญยฺยญฺจ อพฺยากตํ เกนจิ วิญฺเญยฺยญฺจ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ (1)

อกุสลํ เกนจิ วิญฺเญยฺยญฺจ อพฺยากตํ เกนจิ วิญฺเญยฺยญฺจ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ (1)

[42] กุสลํ เกนจิ วิญฺเญยฺยํ ธมฺมํ ปฏิจฺจ กุสโล เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยาฯ (1)

อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยาฯ (1)

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ อารมฺมณปจฺจยาฯ (1) (สํขิตฺตํฯ)

[43] เหตุยา นว, อารมฺมเณ ตีณิ…เป.… อวิคเต นว (สํขิตฺตํ)ฯ

ปจฺจนียํ

นเหตุปจฺจโย

[44] อกุสลํ เกนจิ วิญฺเญยฺยํ ธมฺมํ ปฏิจฺจ อกุสโล เกนจิ วิญฺเญยฺโย ธมฺโม อุปฺปชฺชติ นเหตุปจฺจยาฯ (1)

อพฺยากตํ เกนจิ วิญฺเญยฺยํ ธมฺมํ ปฏิจฺจ อพฺยากโต เกนจิ วิญฺเญยฺโย ธมฺโม อุปฺปชฺชติ นเหตุปจฺจยาฯ (1) (สํขิตฺตํฯ)

[45] นเหตุยา ทฺเว, นอารมฺมเณ ปญฺจ, นอธิปติยา นว…เป.… โนวิคเต ปญฺจ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

เหตุปจฺจโย

[46] กุสโล เกนจิ วิญฺเญยฺโย ธมฺโม กุสลสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโย… ตีณิฯ

อกุสโล เกนจิ วิญฺเญยฺโย ธมฺโม อกุสลสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโย… ตีณิฯ

อพฺยากโต เกนจิ วิญฺเญยฺโย ธมฺโม อพฺยากตสฺส เกนจิ วิญฺเญยฺยสฺส ธมฺมสฺส เหตุปจฺจเยน ปจฺจโยฯ (1) (สํขิตฺตํฯ)

[47] เหตุยา สตฺต, อารมฺมเณ นว…เป.… อวิคเต เตรส (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํ)ฯ